Цифрлық құзыреттерді дамыту және білім сапасын арттыру мақсатында М. Өтемісов атындағы Батыс Қазақстан университеті 2025 жылғы 31 қазаннан бастап университеттің профессор-оқытушылар құрамы мен қызметкерлеріне халықаралық Coursera білім беру платформасына тегін қолжетімділік ұсынды.

Бағдарламаға қатысушыларға әлемнің жетекші университеттері мен компаниялары әзірлеген 12 000-нан астам онлайн-курс қолжетімді болды. Олардың қатарында Stanford University, Yale University, Google, IBM және білім мен технология саласындағы өзге де беделді ұйымдар бар.

Оқыту кәсіби өсуге және заманауи құзыреттерді дамытуға бағытталған негізгі бағыттар (коллекциялар) бойынша жүзеге асырылды:

• жасанды интеллект;
• білім берудегі болашақ технологиялар;
• білім берудегі инклюзия;
• HR және адами ресурстарды басқару.

Аталған бастама М. Өтемісов атындағы БҚУ-дың озық халықаралық білім беру тәжірибелерін енгізуге, цифрлық мәдениетті дамытуға және сапалы білім беру кеңістігін қалыптастыруға деген ұмтылысын айқын көрсетеді. Coursera платформасындағы курстар университет оқытушылары мен қызметкерлері тарапынан жоғары бағаланды.

Өз әсерімен педагогика ғылымдарының кандидаты, доцент, М. Өтемісов атындағы БҚУ оқытушысы Өтегенова Қарлыға Тасқалиевна бөлісті:

«Coursera платформасында қосымша білім алуға мүмкіндік жасағаны үшін университет басшылығына алғысымды білдіремін. Қысқа уақыт ішінде мен цифрлық білім беру ресурстарын қолдануды меңгеріп, түрлі цифрлық платформаларды оқу үдерісіне кіріктіруді үйрендім. Сонымен қатар GenAI-ды оқыту мен кәсіби қызметтегі тиімді көмекші ретінде пайдаланудың маңызын түсініп, өз креативтілігімді дамытуға үлкен серпін алдым».

Педагогика факультетінің деканы, педагогика ғылымдарының кандидаты Ирғалиева Гүлжан Алғазиевна:

«Coursera платформасындағы курстар материалдың жүйелі берілуімен және сапалы білім беру ресурстарына қолжетімділігімен ерекшеленеді. Әсіресе жасанды интеллектіні қолдана отырып, менеджмент пен басқаруға арналған курстардың маңызы зор. Бұл курстар басқару қызметінде жасанды интеллектіні пайдаланудың тұтас түсінігін қалыптастыруға ықпал етеді. Қосымша білім беру бағдарламаларын меңгеруге және қазақстандық білімнің халықаралық деңгейде бәсекеге қабілеттілігін арттыруға жағдай жасағаны үшін Қазақстан Республикасы Ғылым және жоғары білім министрлігіне және М. Өтемісов атындағы Батыс Қазақстан университетінің басшылығына ризашылығымды білдіремін».

Мукашева З.У.
қашықтан және онлайн оқыту орталығының жетекшісі

Махамбет университетінде студенттерге арналған профилактикалық кездесу өтті. Іс-шара «Заң мен тәртіп» тұжырымдамасы аясында ұйымдастырылды. Кездесудің негізгі мақсаты — жастардың құқықтық мәдениетін қалыптастыру және қазіргі қауіп-қатерлер туралы түсіндіру. Мамандар нашақорлық пен лудоманияның алдын алу, заңсыз әрекеттердің салдары жөнінде нақты ақпарат берді. Студенттердің ерекше қызығушылығын кинолог мамандардың қызметтік иттермен жасаған көрсетілімі тудырды. Шараға 300-ге жуық студент қатысты. Қатысушылар мұндай ашық диалогтардың маңыздылығын атап өтті. Заңға құрмет — қауіпсіз болашақтың негізі.

Педагогика факультетінде ерекше білім беруді қажет ететін студенттерге арналған бірнеше жаңа мамандандырылған кабинеттер ресми түрде іске қосылды:

• Сенсорлық интеграция кабинеті
• «Қолдау» бейімдік қозғалыс кабинеті
• Монтессори кабинеті

Жаңа кабинеттер студенттердің оқу процесіне тең дәрежеде қатысуына жағдай жасап, олардың сенсорлық, моторлық, танымдық және эмоционалдық дағдыларын дамытуға бағытталған. Мұнда білім алушылар практикалық дағдыларын шынайы ортада дамыта алады, ал болашақ педагогтар сенсорлық интеграция, бейімдік қозғалыс, логопедиялық және психологиялық түзету бойынша тәжірибе жинайды. Бұл кабинеттер студенттердің оқу жетістігін арттыруға, әлеуметтенуіне және шығармашылық әлеуетін дамытуға зор мүмкіндік беретініне сенімдіміз.

М.Өтемісов ат. БҚУ ҚР Тәуелсіздігі күніне арналған «Цифрлық дәуірдегі тәуелсіздік құндылықтары: жаңа буынның көзқарастары» атты халықаралық ғылыми-тәжірибелік конференция өтті. Бұл басқосу – отандық және шетелдік ғалымдардың, тәжірибелі мамандардың, жас зерттеушілердің еркін пікір алмасатын, жаңа идеяларды тоғыстыратын ашық алаңы болды. Бүгінгі ұрпақ үшін Тәуелсіздік – тек тарих беттеріндегі дата емес. Бұл — цифрлық қоғамда өз орнын табу, ұлттық болмыс пен рухани құндылықтарды жаңа технологиялық ортада қайта таныту, заманауи әлемде Қазақстанды лайықты таныту миссиясы. Конференция дәл осы бағыттағы ғылыми ойды тереңдетуге мүмкіндік берді. Басқосуда Италия, Түркия, Ұлыбритания, Германия, Ресей, АҚШ университеттерінен келген ғалымдар Тәуелсіздік идеясының мәдениеттегі, тарихтағы, халықаралық қатынастардағы және цифрлық ортадағы жаңа мазмұнын талқылады. Ғалымдар көк бөрінің мифологиялық мәнінен бастап, қазақ қыздарының ерлік рухына, Қазақстанның сыртқы саясатының жаңа бағыттарына, Түркі ренессансының ғылыми интерпретациясына дейінгі кең ауқымды тақырыптарды қамтыды. Әрбір баяндама – жаңа ой, жаңа көзқарас, жаңа ғылыми пайым. Сонымен қатар біздің университеттің жас зерттеушілері де ерекше белсенділік танытты. «HistHunt» Telegram-бот жобасын таныстырған 4-курс студенттері тарихи білімді заманауи форматта жеткізудің жаңа үлгісін көрсетті. Бұл – цифрлық дәуірге бейімделген жас буынның нақты бастамаларының бірі. Конференцияға қатысушылар талқылаудың жоғары деңгейде өткенін атап, пікірлерін бөлісті. Мемлекет тарихы, ұлттық құндылықтар және цифрлық трансформация арасындағы байланысқа арналған мұндай алаңның маңызы зор екені айтылды. Біз үшін ең құндысы — жас буынның еліміздің Тәуелсіздігін заманауи құралдармен, жаңа ғылыми әдістермен, цифрлық мәдениетпен түсіндіруге және дамытуға деген ұмтылысы.